Usı jıldıń 5-sentyabr kúni Ózbekstan Respublikası Prezidentiniń 27.01.2025-jıldaǵı 10-sanlı Pármanınıń tiyisli bántiniń orınlanıwı boyınsha Kegeyli rayonında jaylasqan Akademik M.Mirzaev atındaǵı Baǵshılıq, júzimgershilik hám vinoshılıq ilimiy-izertlew institutınıń Qaraqalpaq ilimiy-tájiriybe stanciyası tájiriybe xojalıǵında shólkemlestirilgen úlgi atız maydanında baǵshılıqta innovaciyalıq texnologiyalar temasında kórgizbeli seminar ótkerildi.
Seminarda QR AKIS orayınıń qánigeleri tárepinen Pármannıń mazmun-mánisi, úlgili atız shólkemlestiriw tártipleri, baǵshılıqtı rawajlandırıw maqsetinde húkimet tárepinen belgilengen subsidiyalar haqqında maǵlıwmatlar berildi. Sonday-aq, ilim hám óndiristiń integraciyasın támiyinlew maqsetinde sapalı nál hám miywelerdi kommerciyalastırıw boyınsha birge islesiw baǵdarları kelisip alındı.
Seminar dawamında ITS qánigeleri tárepinen Pármannıń orınlanıwı boyınsha shólkemlestirilgen úlgi atızdaǵı júzim, erik, alma miywe nálleriniń jaǵdayı, agrotexnikalıq ilajlar, aldaǵı ámelge asırılatuǵın jumıslar boyınsha maǵlıwmat berildi. Bunnan tısqarı, fermerler ushın nál otırǵızıwǵa jerdi tayarlaw, nál otırǵızıw, azıqlandırıw, kesellikler hám zıyankeslerge qarsı gúresiw, miywe baǵların qáliplestiriw boyınsha ilimiy tiykarlanǵan usınıslar berildi.
Seminar juwmaǵında fermerlerge miywe baǵlarında ámelge asırılatuǵın agrotexnikalıq ilajlar boyınsha islep shıǵılǵan usınıslar tarqatıldı.
O'z
Qq
Ру
En