Usı jıldıń 11-aprel kúni Qaraqalpaqstan Respublikası Agroxızmetler orayınıń direktorı B.Annaqulov Hindstannıń abıraylı tuqımgershilik kompaniyalarınan biri - Nath Bio-Genes kompaniyasınıń direktorı doktor Satydev Pathak penen ushırasıw ótkerdi.
Ushırasıw dawamında tárepler óz-ara birge islesiwdi rawajlandırıw, zamanagóy agrotexnologiyalardı engiziw hám paxta jetistiriw nátiyjeliligin arttırıw máselelerin hár tárepleme dodaladı. Atap aytqanda, Qaraqalpaqstan Respublikasınıń ózine tán topıraq-ıqlım sharayatın esapqa alǵan halda, Nath Bio-Genes kompaniyası tárepinen islep shıǵılǵan paxtanıń 4 perspektivalı sortın tájiriybe-sınaq tárizinde egiw boyınsha kelisimge erisildi.
Qoyılatuǵın tájiriybe-sınaw jumısları aymaqta joqarı ónimdarlı, keselliklerge shıdamlı hám klimat sharayatına beyimlesken sortlardı anıqlawǵa xızmet etedi. Sınaw nátiyjeleri tiykarında eń nátiyjeli sortlardı keń maydanlarǵa engiziw rejelestirilmekte. Bul bolsa óz gezeginde paxta jetistiriw kólemin arttırıw, ónimniń sapasın jaqsılaw hám fermer xojalıqlarınıń dáramatın kóbeytiwge xızmet etedi.
Ushırasıw juwmaǵında tárepler keleshekte birge islesiwdi bunnan bılay da keńeytiw, ilimiy-tájiriybe almasıw hám innovaciyalıq sheshimlerdi engiziw baǵdarında óz-ara paydalı joybarlardı ámelge asırıwǵa tayar ekenin bildirdi.
O'z
Qq
Ру
En